Antón Cortizas 

SONETO DE PAZ

(a Gandhi, por exemplo)

Chamádesvos pacíficos señores,
teimosos oficiais condecorados,
lucides ideais por ambos lados
e sempre na defensa dos balores.

Non sei que paz vos quere tan armados,
que paz estraña é esa que precisa
que usedes verde e caqui a camisa
e os dentes sempre arregañados.

Ignoro, sen agriar pra nada a alma,
coas mans ben recollidas nos seus petos,
a vosa triste paz e enferma calma.

Non gosto de escoitar os vosos grilos.
Gardádevos nos vosos parapetos
e a min e aos máis dexádenos tranquilos.

Antón Cortizas. (maio 2003)

(1valor = valentía; balor = mofo)

voltar